Laki-Laki di Pennsylvania Mati Diimpik Pacar

PENNSYLVANIA -  Gara-gara basiarak bakaruak arang, ujuangnyo baakibaik fatal. Angok malayang diimpik pacar.

Surang laki-laki nan banamo Keeno Butler (44) mati sasak angok dek diimpik pacarnyo,  Windi Thomas, padusi nan bareknyo alahurabi, 300 pon atau 135 kg. Samantaro barek korban hanyo 54 kg.

Polisi akianyo manangkok Windi sasudah Windi surang nan manalepon 911, nomor daruraik polisi. Mayik korban dievakuasi patugeh, nan padusi diangkuik ka kantua polisi. Sudah tu kasusnyo lanjuik ka jaksa panuntuik.

Peristiwa ko tajadi Minggu pagi bulan Maret tahun 2018 nan lapeh di apartemen mereka baduo di East Avenue nomor 1019.

Windi ditahan di kandang situmbin atau pinjaro Erie County. Sasudah disidik akianyo lanjuik sidang partamo bulan Desember 2018 di muko Hakim Distrik Erie Wilayah ka-6, Timothy Beveridge.

Ancaman hukumannyo 20 sampai 40 tahun pinjaro negara bagian utk pembunuhan tingkek partamo.

Nan kecek Polisi, bahasonyo Windi indak sajo maimpik pacarnyo, tapi juo mancucuak korban jo pisau lipek, sampai maninju kapalo pacarnyo bagai. Bahkan (masih kecek polisi), Windi sampai malakak kapalo korban pakai kaki meja.

Samantaro tu, dalam dakwaan disabuik an bahasonyo, kematian korban dinyatokan sebagai pembunuhan nan disebabkan dek insufisiensi pernapasan sekunder akibaik trauma benda tumpua di talihia jo takanan barek di dado.

"Tambah lo trauma benda tumpua di kapalo korban," baitu bunyi catatan pengadilan.

Vonis hakim

Menuruik barito Assosiated Press, Windi akianyo manyatujui hukuman nan direkomendasikan yaitu 18 sampai 36 taun pinjaro negara bagian. Windi mangaku basalah ateh pembunuhan tingkek tigo yaitu yaitu pambunuhan nan indak direncanakan jo niaik jaek. Kalau tingkek partamo bisa 20-40 taun pinjaro.

Hakim Erie County, William R. Cunningham manarimo pangakuan basalah tu. Dek terdakwa lah mangaku basalah, Asisten Jaksa Distrik Erie County Jeremy Lightner mencabuik dakwaan penyerangan barek, mambahayokan sacaro sembrono, jo kapemilikan alaik kejahatan (pisau lipek).

"Iko hasia nan elok berdasarkan fakta-fakta kasus ko," kato pengacara WIndi nan ditunjuak pengadilan, Mark Del Duca, dari Pittsburgh. "Ambo pikia iko lah adia bagi kaduo belah pihak," tukuaknyo. 

Indak dibaritokan apo nan manjadi pangkabala kaduonyo basiarak sampai tajadi pembunuhan tu. (Oce)